Hæ allir

Þessi vika fer að mestu í undirbúning fyrir ömmu- og afadaginn sem er á þriðjudaginn í næstu viku. Þá mega börnin bjóða ömmum og öfum að koma í heimsókn til okkar í leikskólann. Börnin fá boðskort með sér heim á morgun sem börnin mega afhenda ömmu og afa

Í gær fóru Snillingar í sína fyrstu heimsókn út í Flúðaskóla. Þau fóru í stöðvavinnu með 1.bekk og var þeim skipt á 4 stöðvar = verkefnahefti, bókakrókur, lego og leir, þar sem þau áttu að leira nafnið sitt. Öllum gekk mjög vel að aðlaga sig þessu formi og taka þátt og enduðum við heimsóknina á því að fara í frímínútur með skólakrökkunum. Næst kemur 1.bekkur í heimsókn til okkar og munum við fara í myndlist og tónlist þann 19.okt kl: 8:40…gott væri ef börnin sem eru með vistun frá kl. 9 kæmu um 8:30 þann daginn.

Í morgun var svo brunaæfing hjá okkur. Hún gekk ljómandi vel, við rýmdum leikskólann á rétt rúmlega einni mínútu. Sumir urðu skelkaðir en öðrum fannst mikið sport að fá að hlaupa út á sokkunum

Á morgun er Snillingastund og Vitringar fara í gönguferð með Elínu og Jónínu.

Á föstudaginn er leikskólinn svo lokaður vegna haustþings 8.deildar á Selfossi.

Kv. Freyja, Jónína, Dúna og Elín.

Vikan er búin að vera fljót að líða og nóg að gera eins og alltaf. Ekkert varð af brunaæfingunni sem átti að vera vegna tæknilegra örðugleika…en stefnan er tekin á næstu viku þannig að aukasokkar eru nauðsynlegir í næstu viku líka

Upp úr stendur fagnaðarfundurinn okkar sem var í gærmorgun. Við lékum leikritið um Rauðhettu og stóðum okkur eins og hetjur. Margir kunnu sín hlutverk og voru ekkert smeykir við að tala sjálfir og láta í sér heyra Þökkum þeim sem sáu sér fært að koma, það var gaman að sjá ykkur

Í næstu viku verður nóg að gera hjá okkur í hefðbundnu hópastarfi og í undirbúningi fyrir ömmu- og afadaginn okkar sem verður 11.okt. Margt þarf að bralla í kringum þann dag Snillingar fara í skólaheimsókn á þriðjudaginn og verður það eflaust mikið fjör.

Að lokum langar okkur að minna á mikilvægi þess að hafa nóg af aukafötum í töskunni

Kv. Freyja, Jónína, Dúna Rut og Elín.

Okkur finnst sumarið vera komið aftur til okkar og  börnin eru ekkert lítið ánægð með blíðuna sem er búin að vera síðustu tvo daga. Við erum búin að nýta veðrið vel og fórum t.d. að safna laufblöðum og erum svo bara mikið úti við.

Við héldum aðeins áfram með réttarvinnu og bjó Tröllahópur aftur til réttir úr einingakubbunum og greinilegt að þau hafa tekið vel eftir hvernig réttirnar litu út sl. föstudag því munurinn á því hvernig þau útfærðu réttirnar var gríðarlegur Hestahópur fór í laufblaðatínslu og bjó m.a. til óróa úr laufblöðum og reyniberjum.

Art gengur vel, nú eru búnar 4 vikur hjá okkur af 12 og í þessari viku lærðu börnin að hunsa. Þau fengu með sér heimaverkefni sem þau eiga að vinna um helgina.

Snillingar fóru í heimsókn í byggðasafnið í Gröf á mánudaginn með 1.bekk og tók Guðjón á móti þeim. Þau skoðuðu marga gamla hluti og eftir spjall í dag þá komumst við að því að öxin og græni bíllinn hefðu verið í uppáhaldi í heimsókninni. Í snillingastund í dag fórum við í Art upprifjun á því hvernig við tölum fallega, teiknuðum mynd um heimsóknina í Gröf og æfðum okkur að ríma og setja saman og taka sundur orð.

Í frjálsa leiknum þessa dagana stendur upp úr að leika í dúkkó, playmó, perla, teikna/lita/púsla og kubba.

Kv. Freyja, Jónína, Dúna og Elín.

Við erum mikið að spjalla um réttir og kindur og fá að heyra frá börnunum hvað þeim finnst skemmtilegast í sambandi við réttirnar og hvað þeim langar að gera á réttardaginn, svörin eru eins mismunandi og börnin eru mörg og að sjálfsögðu þrælskemmtileg

Tröllahópur er búinn að útbúa kindur úr margvíslegum efnivið ásamt kembunni okkar góðu, þær eru mjög skrautlegar svo ekki sé meira sagt. Þau bjuggu til réttir í morgun fyrir kindurnar og svo er stefnan tekin á að útbúa fleiri kindur á morgun.

Hestahópur var í kinda vinnu í síðustu viku og ætlar að halda áfram eitthvað í þessari viku. Þau bjuggu til myndir með sandi, ull, lími og tússi, mjög skemmtilegar og hægt að kíkja á þær á veggnum inni á Skógarkoti

Við erum að syngja nokkur skemmtileg lög og þ.á.m. Siggi var úti, Rúnki fór í réttirnar, klappa saman lófunum og fleiri lög sem hafa tilvísun í kindur, réttir og smalamennsku.

Bestu kveðjur,

Freyja, Jónína, Dúna Rut og Elín.

Hjá okkur er búið að vera nóg að gera í vikunni. Á mánudaginn kom 1.bekkur og hjálpaði okkur að taka upp kartöflur og fengum við góða uppskeru í ár og allir fengu kartöflur með sér heim.

 Á þriðjudaginn fór Tröllahópur í listasmiðju og Hestahópur í útikennslu.

Á miðvikudaginn var farið í haustferð upp í Tungufellsdal. Farið var með rútu og var það mikið sport! Við tíndum svo krækiber og bláber, lékum okkur og einhverjir prófuðu að vaða í Dalsánni Mjög skemmtilegur dagur.

Í gær fóru Snillingar í snillingastund þar sem við kláruðum fyrsta Núma verkefnið og æfðum okkur að spora nafnið okkar. Tekin var upprifjun á skjaldbökunni í Art-inu hjá þeim.

2007 börnin eru að standa sig mjög vel í Artinu og í þessari viku erum við búin að vera að ræða um reiðina og höfum t.d. varpað fram spurningunum Af hverju verðum við reið og hvar finnið þið til þegar þið verðið reið? Við teiknuðum reiðikarl og merktum inn á staði sem við finnum til á og þau teiknuðu sig sjálf þegar þau eru reið. Í næstu viku förum við í siðfræði, hvað má og hvað ekki?

Í næstu viku verður lögð mikil áhersla á vinnu með íslensku sauðkindina, unnið með ull og búin til verk sem tengjast sauðkindinni og réttum, því eins og flestir vita verða Hrunaréttir eftir viku

Nóg af myndum á myndasvæðinu fyrir ykkur að skoða.

Góða helgi.

Kv. Freyja, Jónína og Dúna Rut

Hjá okkur er búið að vera brjálað að gera það sem af er vikunni og verður svipað áfram ART þjálfun fór af stað hjá 2007 börnum í gærmorgun og eru þau nú búin með 2 tíma af 3 í 1.viku félagsfærni. Við erum að taka fyrir færnina að hlusta og gengur ágætlega að æfa sig í því

Hópastarfið er komið á fullt og eru komin nöfn á hópana: Jónína og Dúna eru með Hestahóp og í honum eru Anna Katrín, Ásdís Mjöll, Gabriel, Anastasia, Ingunn Lilja, Patryk Zenon og Dawid. Freyja er með Tröllahóp og í honum eru: Jón Valgeir, Magni Fannar, Rebekka, Ásdís Rún, Kamilla Rós, Emil og Þorsteinn Ingi. Í þessari viku er Hestahópur í myndlist og Tröllahópur í tónlist/hreyfingu.

Á morgun byrjum við á Snillingastundum hjá 2006 börnum og þau fá með sér skipulag skólaheimsókna fram að áramótum heim í dag, miðvikudag.

Þessa dagana rignir mikið á okkur og því er mikilvægt að börnin séu með stígvélin, pollagalla, húfu, vettlinga og nóg af aukafötum í töskunni, því okkur finnst gaman að sulla í pollunum

Kv. Freyja

Í gær, 24.ágúst, gengum við út að Seli og tíndum fullt af rifsberjum og nokkur sólber. Okkur gekk ágætlega að ganga alla þessa leið og fengum hressingu í golfskálanum um leið og við komum. Ásta Guðný bauð okkur upp á melónur, appelsínur og djús áður en við héldum út að tína ber. Við vorum svo sótt og keyrð aftur í leikskólann. Við tíndum 4 kíló af berjum og í morgun sultuðum við svo úr berjunum, allir fengu að fylgjast með og taka þátt í ferlinu.

Myndir af berjatínsluferðinni, sultugerðinni og lífinu í leikskólanum má finna á myndasíðunni okkar Endilega kíkiði.

Við erum aðeins farin að vinna með sauðkindina og réttirnar og virðast börnin vera mjög spennt fyrir þeirri vinnu. Dembum okkur í þetta af fullum krafti eftir helgi.

Kv. Freyja

Á morgun er stefnan tekin á berjatínsluferð á golfvöllinn á Seli. Við ætlum að tína rifsber og sólber og búa svo til sultu úr þeim og koma með heim Við ætlum að leggja af stað kl. 9:15 frá leikskólanum þannig að gott væri að allir mættu tímanlega í fyrramálið :

Kv. Freyja

Jæja, þá er sumarfríið búið og börnin koma hægt að sígandi inn til okkar. Enn vantar 5 börn á Skógarkot en vonandi skila þau sér til okkar eftir helgi. í vetur verða 14 börn á Skógarkoti, fædd 2006 og 2007. Freyja, Jónína og Dúna verða þeim til halds og trausts og Elín mun koma reglulega til okkar líka. ART fer af stað líklega í lok ágúst og svo ætlum við að reyna að þróa okkur enn frekar í útikennslunni og nýta efniviðinn í náttúrunni.

Spennandi vetur framundan

Kv. Freyja

Hún Guðrún Lilja er 6 ára í dag 30. júní.

Við óskum henni til hamingju með daginn.

Í tilefni dagsins bauð hún öllum leikskólanum upp á ís:)

Takk fyrir okkur

Kveðja allir á Undralandi